ՕՐՈՐ

Ես հնարել եմ այս երգը,

Որ դու հանկարծ չտխրես,

Որ կորցրած քո երազը

Քո քնի մեջ դու գտնես:

 

Որ դու սիրես այս աշխարհը

Ու հավատով այդ ապրես.

Դու քո կյանքի ճանապարհը

Միշտ լուսավոր կտեսնես:

 

Թե մթնի քայլելու քո ճամփան մի օր,

Թո՛ղ հնչի իմ այս երգը՝ որպես օրոր:

 

Քոնն է հրաշք այս աշխարհը,

Եվ այս հեքիաթն իրական,

Եվ այս դաժան մոլորակը,

Եվ փորձության քո ճամփան:

 

Ես հնարել եմ այս երգը,

Որ դու չհուսահատվես,

Քեզ պարգևած այս հրաշքը

Քո ձեռքից բաց չթողնես:

 

Հավատա՛ և սիրի՛ր, իմ փոքրի՛կ ընկեր,

Կյանքը այս քեզ տրված է՝ որպես նվեր: