Եվ իմ գողթնեցի պապերի նման

Ես պիտի գրեմ առանց հանգերի,

Ինչպես խոսում են մարդիկ իրար հետ,

         Ու եթե չափով՝

         Լոկ նրա՛ համար,

Որ սրտիս նման խոսքս էլ տրոփի...

         Ու եթե պոետ...

 

         Կուզեի լինել

Պոեզիայի մեջ... միայն երկրաբան -

         միշտ որոնեի

         և... երկրի վրա,

         ընդերքում երկրի:

Սիրում եմ լինել ինքըս իմ հյուրը

Ու հյուրասիրվել համեղ... հուշերով,

Եվ կոչնակներ ունենալ նրանց,

Որոնց անունը ես չեմ մոռանա,

Ինչպես սեփական իմ իսկ անունը,

Բայց նաև նրանց, անունը որոնց

Ես - մի՛ զարմացեք - չեմ հիշում արդեն,

Եվ չի գտնըվի գեթ մի մարդ կյանքում,

Որ կարողանար ինձ հիշեցընել

         Անունը նրանց,-

         Եկան ու չանցան՝

         Մի մազ տանելով,

         Մի մաս պարգևած...

         Ա՜խ, իմ մեծ Սերը...

 

         Նա հավասար է

Կորած հույսերիս ճիշտ քառակուսուն

Ու երազանքիս խեղճ մնացորդին...

         Ա՜խ, իմ մեծ Վիշտը...

 

         Եվ նա իմը չէ,

         Այլ բոլո՜ր նրանց,

         Ում որդին եմ ես

         Եվ կամ թե հայրը:

 

         Ա՜խ, իմ մեծ Վիշտը,

Որ չի բաժանվում ամենքի վրա...